بدع جديد مرسل الى الشاعر الكبير / توفيق عبدالله ابوزيده
ـــــــــــــ
ربـّاه عــبدك أقبلك طـــائـع ونفـسه راضـيه
===== قـنوع مـن دنيا النـدم , طـامع بعفـوك يالودود
سالك رضاك ورحمتك , سترك ولبس العافيه
===== وجـنتك , واعــوذ بـك من معمعة ذات الوقود
وبعــد قـال العوبثي سليّت حــرف القافيه
===== بجعل صليله في سطور المعركه برق ورعود
راكــب على افصح أصيلات الطروق العاديه
===== "مُـهره حُـمينيه" لها تاريـخ في طــيَ البعود
تـدرك معانيها , وفـارسـها الولـيد الداهيه
===== آخــر مفـوّه بالعـرب , كندي بلاده أرض هـود
خذها عن اللي سطروا مجد السنين الماضيه
===== من في المجابه يجعلوا جماجم الأعداء عقود
عقود في صــدر الجبل لبيض وراس الباكيه
===== ذي لا لما من فوقها تمـسي سـواقيها ورود
والليله ان النجم يلمع في سماي الصافيه
===== كنه يناديني تأهـب وأطلع الشــامخ سـنود
من هاهنا من موقعي حيث الوحوش الضاريه
===== من واد حبّان الشرف مربى النماره والأسود
قم ياولد في واجـبك وارحل بضربه قاضيه
===== مكتوب تأثيره كما "صاروخ سوفييتي سكود"
واقصـف ديار المـأربي ولا تـذر له باقيه
===== وقبل يتشهد أمـــانه هـــات أقـــواله وعــود
قل له تراني مرتفــع عن كل ماهي دانيه
===== عيني تروم القاصـيه والرجـل تجـتاح الصعود
قل له ســمعنا زلتك لو ما دريـت الآتيه
==== قلت ان شبوه وأهلها ماهم على نهج الجدود
كل الدوافع والحجج عندك صــراحه وآهيه
===== ماقـد سـلف منك جــبرني أنتزع كــل القيود
شــبوه عزيزه بـ أهلها والله ومأرب غاليه
===== مابا انجرف في مسلكك مهما تبادر بالجحود
دامـك تخاطبنا بـ لهجـه عنصـريه باغيه
===== عاد اللبن قم واطرشه او بايقـع سـم الكبود
ما القــاعده ذي عندنا وعندكم متواليه
===== اهل البلد ماحد خـوراج غير بن عمك سعود
وكل تعييرك لنا قد كــان هــدره فاضيه
===== كـــونك بتعرف أصلهم أيضا ًومن أين الطـرود
اخفض زعيقك نحونا واصــرخ بوجه الراعيه
==== ذي ضيعت بوش العرب من خلف نومه بالبرود
ذا فصل أول قد خرج فيه العـرب متوافيه
==== عفوت عنّك لأجــل لا نوصل الى سلخ الجـلود
ايضا ًومن أجل اختصر وابدا معك بالثانيه
===== عادت حليمه وانت تهتف لا حليمه لن تعـود
ماهي شـماته إنما إطــرح إجـابه شافيه
==== لأني أرى عبدالملك سيله جــرف كل السدود
كل المعاقل في طـريقه بالتسلسل خـاويه
===== هو رِك فيكم او خــيانه مثلما ســابق عهود
الى متى يسـرح ويمرح والحــكومه غافيه
==== لا والله إلا الموت أشرف شأن من بعض الرقود
أم إن بن منصور يترقـب يخــوض الحاميه
===== من بعد ماتُحسم لمن بين الدواعش والزيود
ما شـأننا لحـنا وياكم له كفف متساويه
===== فتاح عـكّر صـفوها واليــوم بن هـادي يجـود
مابا ترد السيل مطلع وان كسرت الساقيه
===== خــيره ولكن بعـدها أبصــم بترسـيم الحدود
ياكم صبرنا عنكم رغــم الظروف القاسيه
===== عقدين وأكثر بينما "ماشي تغير في عبود"
وطبعكـم تربه خصـيبه لو خلعتوا طـاغيه
===== في الحـال ينبت طاغيه وانه تقـدمكم يقود
الله يكفينا بلاكــم , شـلها فـي الناصيه
===== طعن القفا ماهو لنا حتى ولو ما احنا سدود
تميت والان اســتلم باقي عليك التاليه
===== تركت أسهلها وارويتك على عــذب العـدود
والخاتمه صلوا على شفيع يـوم الغاشيه
===== شفيعنا في يوم يجمعنا في المحشر حشود
ليست هناك تعليقات:
إرسال تعليق